Американскиот претседател, Доналд Трамп, и неговиот потпретседател Џ. Д. Венс учествуваат на виртуелен состанок со лидерите на европските земји. Британските медиуми наведуваат дека европските лидери прво ќе одржат меѓусебен видео состанок за да ги координираат своите позиции пред да разговараат со Трамп за неговите претстојни преговори со рускиот претседател Владимир Путин во Алјаска.
Неизвесноста околу исходот од руско-американскиот самит предизвика стравувања во Европа дека Трамп и Путин би можеле да донесат далекусежни одлуки, па дури и да извршат притисок врз Украина да прифати неповолен договор.
Видеоконференцијата меѓу украинскиот претседател Володимир Зеленски и лидерите на Германија, Финска, Франција, Велика Британија, Италија, Полска и Европската унија, според германската влада, е во тек бидејќи беше закажана за 14 часот, а на него е најавено присуство на генералниот секретар на НАТО.
Средбата меѓу Трамп и Путин ќе се одржи в петок, 15 август, во Енкориџ, Алјаска.
