Европската комисија подготвува нов заем од 45 милијарди евра за финансиска помош на Украина, обезбеден со гаранции од заедничкиот буџет на Европската Унија. Предлогот доаѓа во критичен момент, додека Киев се подготвува за најтешката зима од почетокот на руската инвазија.
Според проценките, на украинскиот буџет следната година ќе му недостигаат 70 милијарди евра. Европската комисија вети дека ќе покрие две третини од таа сума и ги повика западните сојузници дополнително да ја зголемат поддршката.
Новиот заем бара едногласна согласност од сите 27 земји членки. Чешка, Словачка, Унгарија и Бугарија веќе најавија дека немаат намера да учествуваат во идното финансирање.
Ова предизвика остри реакции во Берлин. Германскиот канцелар Фридрих Мерц се закани дека ќе го блокира долгорочниот буџет на Унијата за периодот од 2028 до 2034 година, условувајќи ја германската поддршка со задолжително учество на сите членки во помошта за Украина.

