Директорот на Дирекцијата за технолошки индустриски развојни зони, Гоце Димовски, кој е дел од македонската делегација која престојува во политичко-економска посета на Унгарија, денеска во Будимпешта на настан организиран по повод Денот на деловна соработка меѓу Унгарија и Македонија, пред претставници на унгарската бизнис заедница ги презентираше инвестициските потенцијали и можностите што ги нуди државата и ТИРЗ за странските инвеститори.
Димовски, во своето излагање, се осврнал на поволната бизнис клима, конкурентните услови за инвестирање и активната институционална поддршка што им се обезбедува на компаниите во технолошко индустриските развојни зони. Тој посочил дека државата нуди стабилна и предвидлива деловна средина, како и конкретни механизми за поддршка во сите фази од инвестицискиот процес. Посебен акцент бил ставен на потенцијалите за понатамошно продлабочување на економската соработка меѓу двете земји, како и на можностите за реализација на нови инвестиции, особено во сектори со висока додадена вредност.
Воведни обраќања на настанот, имале и премиерот Христијан Мицкоски и министерот за европски прашања на Унгарија, Јанос Бока, кои ја истакнаа важноста од унапредување на економската соработка и продлабочување на партнерството меѓу двете земји.
Мицкоски, како што информираат, нагласил дека директната комуникација меѓу компаниите е клучна за создавање нови деловни модели, за отворање пазари и за генерирање одржлив економски раст. Во таа насока, премиерот Мицкоски упати јасна порака до деловната заедница дека Македонија е отворена за инвестиции и партнерства, нудејќи поволни услови, стратешка географска позиција и квалификувана работна сила. Тој ги охрабри унгарските компании да ги разгледаат можностите за инвестирање во земјата, но истовремено потенцираше дека македонските компании се подготвени да ги прошират своите активности и на унгарскиот пазар.
Во рамки на настанот, исто така, биле реализирани и повеќе директни средби со компании, при што беа разменети информации и иницирани конкретни можности за идна соработка.
Во состав на владината делегација се и вицепремиерот и министер за транспорт и врски, Александар Николоски, министерот за економија и труд, Бесар Дурмиши, генералниот секретар на Владата, Игор Јанушев, директорот на Агенцијата за странски инвестиции и промоција на извозот, Рефик Џемаили, како и директорката на Агенцијата за иновации, научно-технолошки развој и претприемаштво, Даниела Димовска.
Тема на разговор на денешната политичко-економска посета на Унгарија, како што е најавено, се унапредување на билатералните односи, економската соработка и актуелните регионални и европски прашања.
