Нема одлука за избор на фирма која ќе гради катна гаража и ќе управува со паркингот во Клинички центар велат од Владата. Истото го потврди и министерот за здравство кој рече дека договорот не е потпишан. Иако на тендеорт се јавила само една компанија „Ѓока констракшн“.Според Таравари, не е проблем да се поништи тендерот и да се распише нов повик, на министерот му биле важни реакциите на јавноста но и “аминот” од Владата за да падне одлука кој да стопанисува со паркингот на Клиничкиот центар.
“Не е потпишан. Паркингот на Клиничкиот центар секогаш прави многу нервоза. Ако за понудата, еве слушам, секогаш многу ми значи јавноста што ќе каже, ако ми кажат дека нешто не е во ред, пуштено е и во Влада, ако и таму ми кажат дека има одредени пропусти, нема да имаме ништо. Ќе го поништиме, ќе објавиме нов, но само ќе изгубиме една година” – вели Арбен Таравари, министер за здравство.
Според Таравари, рокот за стопанисување со паркингот не е 20 години, како што е предвидено со физибилити студијата. Во тендерот, имало услов за понудувачот да го користи паркингот додека на таа локација е Клиничкиот центар и тоа нема да биде повеќе од седум до 10 години.
Министерот најави дека ќе поскапи паркинот на Клинички од 30 на 50 денари за час по преземањето од страна компанијата која ќе добие тендерот.
“Имајќи предвид и какви се цените мислам дека не е лоша. Најдобро е 0 денари да биде, ако најдете таков понудувач, одлично ќе биде. 50 денари мислам дека е пристојна цена, затоа што пред „Нова Македонија“ е 40 денари. Не е цена која е многу висока, таа беше дадена на аукција. Во Скопје има цени кои се 100 денари, 150 денари”, вели Таравари.
Според договорот, кој се уште не е финализиран, компанијата која ќе го добие тендерот треба да изгради две катни гаражи во рок од 6 месеци до една година од преземањето на паркингот.
Инвестицијата би го чинела концесионерот нешто над десет милиони евра. Моментално, на Клиничкиот центар има 800 паркинг места, а со двете катни гаражи би се добиле уште 800 до 900.
