На денешната панел-дискусија по повод една година влада, вицепремиерот и министер за односи меѓу заедниците, Иван Стоилковиќ, изјави дека при неговото доаѓање на функцијата, Министерството било во состојба со разрушени темели, и дека се работело надвор од правилата, прописите, законите и Уставот на нашата држава.
Првиот чекор, како што рече, бил усвојување стратешки план за стабилизација на меѓуетничките односи и создавање услови за економски развој.
„Од времето на претходниот министер до денес, во буџетот со кој јас управувам трошоците во Министерството се намалени за 60% или да го доближам тоа до граѓаните поблиску, заштеда на средства на граѓаните од 1,220.000 евра. Тоа значи дека сите непродуктивни трошоци се укинати, а неодговорното трошење повеќе не постои“, истакна Стоилковиќ.
Тој додаде дека се работи на реорганизација на администрацијата, преземање на нераспоредените службеници и целосна деполитизација на процесите за распределба на средства за невладини организации.
„Наместо министерот да одлучува, сега тоа го прави комисија составена од претставници на речиси сите министерства“, рече Стоилковиќ, порачувајќи дека оставил уреден систем во кој „секој што ќе дојде после него ќе може веднаш да продолжи со работа“.
