Среде подготовките за средбата меѓу претседателите на САД и Русија, Доналд Трамп и Владимир Путин, од Вашингтон доаѓаат вести за неуспешен телефонски разговор помеѓу американскиот државен секретар Марко Рубио и рускиот министер за надворешни работи Сергеј Лавров. По вчерашниот разговор, Рубио наводно му рекол на Трамп дека Русите не се откажуваат од своите максималистички барања. Ова ја одложи средбата Рубио–Лавров, поради што и средбата Трамп–Путин во Будимпешта е под знак прашалник.
Руското Министерство за надворешни работи ги нарече „фарса“ извештаите на западните медиуми дека средбата меѓу шефот на руската дипломатија Лавров и американскиот државен секретар Рубио била одложена. Портпаролката на руското МНР, Марија Захарова, изјави дека протекувањата на информации од западните медиуми се контрадикторни и неосновани. „Не можеме да одложиме нешто за кое не е постигнат договор“, изјави Захарова за планираната средба Рубио–Лавров.
