Претседателката Гордана Сиљановска-Давкова денеска ја прими Даниела Димовска, директорка на новоформираната Агенција за иновации, научно-технолошки развој и претприемништво – ИНОВА.
Како што соопшти претседателскиот Кабинет, таа ја запознала со стратешките приоритети, проекти и активности на Агенцијата. Според неа, современиот економски развој наметнува потреба од унапредување на националниот екосистем, зелените политики, намалувањето на загадувањето и управувањето со отпадот.
Претставниците на ИНОВА информирале за конкретните механизми на Агенцијата за поддршка на стартапите, за програмите за млади претприемачи, како и активностите насочени кон поттикнување на самовработувањето.
-Соговорниците сметаат дека за креирањето на одржливи иновациски политики и пристап до нови пазари и знаења, потребна е интензивна меѓународната соработка, а особено вклучување на нашата дијаспора. Укажувајќи на важноста од стимулирање на иновациите како двигател на конкурентната економија, Сиљановска-Давкова упати на континуирано јакнење на партнерството меѓу јавниот и приватниот сектор, стои во соопштението.
За неа, додаваат оттаму, врската меѓу универзитетите, иноваторите и бизнис секторот, e круцијална претпоставка за практична примена на знаењето и развојот на нови технологии.
-Претседателката, им посака плодотворна и успешна работа, изразувајќи став дека инвестициите во нови технологии носат побрз економски раст, отворање квалитетни работни места и гарантираат повисок животен стандард на граѓаните, наведуваат од прес-службата на Кабинетот на претседателката.
