Националниот проект „Везилка“, кој се развива како голем јазичен модел на македонски јазик, е наменет за примена во државните институции, јавната администрација и приватниот сектор, а неговата идна примена може да биде компатибилна со новите решенија за Е-влада што ги развива Генералниот секретаријат на Владата – истакна министерот за дигитална трансформација Стефан Андоновски.
Во гостување на една од националните телевизии, Андоновски појасни дека „Везилка“ во моментов е во развој и дека е предвидена да се користи во повеќе области, меѓу кои јавната администрација, културата, земјоделството и енергетиката.
– „Везилка“ е национален проект за голем јазичен модел на македонски јазик којшто се гради во моментот и којшто потоа ќе има своја апликативна имплементација во било која од државните институции, приватниот сектор, јавната администрација, културата, земјоделството и енергетиката, рече Андоновски.
Осврнувајќи се на набавката на систем за вештачка интелигенција што ја спроведува Генералниот секретаријат на Владата, министерот изјави дека според информациите со кои располага, станува збор за решение поврзано со Е-влада и поставено на инфраструктура која ќе биде лоцирана во самата Влада.
На прашањето дали новата набавка претставува двоен трошок покрај „Везилка“, тој оцени дека тоа ќе зависи од начинот на којшто ќе се спроведуваат двата проекта.
