Македонија официјално го заштитува својот национален бренд, македонскиот рубин конечно ќе биде регулиран со јасно одредени правила. Министерството за енергетика, рударство и минерални суровини воведува јасни правила, проверен квалитет и доверба околу производството на скапоцениот камен. Со новите правила се воведува систем на верификација а тие што ќе се занимаваат со продажба на каменот ќе добијат електронски сертификати за проверено потекло. Главната цел на оваа иницијатива е да се спречи злоупотребата на името „македонски рубин“ како и неговото лажно претставување а институционалната поддршка е важна и за странските купувачи. Со оваа регулација се очекува и цената на рубинот да се покачи.
„Нашата генерација цел живот во нашето детство, скапоцените камења ги перцепираше како некои скапи предмети, недостижни за нас, од некаде од далеку од некои егзотични земји, Индија, Махараџи, Шехерезада, 1001 ноќ. Тоа било тема на нашите визии од приказните“, изјави Дејан Шкартов, член на комисијата за заштита на македонскиот рубин
Оваа институционална заштита на македонскиот рубин значи и голема поддршка за занаетчиството како и меѓународен потенцијал. Називот „македонски рубин“ ќе смее исклучиво да се користи за производи кои ги исполнуваат сите поставени критериуми, односно потврдени потекло, соодветна документација како и спореведена стручна контрола. За веќе постоечките концесионери на рубинот како и за тие што во иднина би сакале да се занимаваат со продажба ќе биде припремен закон за експлоатација, а владата активно работи на овој проблем.
„До крајот на годината ќе биде комплетно решено законското решение и во овој дел што се однесува до експлоатацијата на корундот т.е. рубинот. Ќе имаат можност и постоечките концесионери но ќе имаат можност и други заинтересирани правни и физички лица да собираат односно да експлоатираат рубин“, изјави Филип Петровски, државен советник во Министерство за енергетика
Веќе во 2025 година министерството заедно со геолошкиот завод ја започна постапката за институционална и правна заштита на македонскиот рубин како географска ознака. Во рамки на тој процес се изработи и елаборат со кој се утврдува потеклото, специфичните карактеристики како и другите релевантни својства на каменот, а со најновиот чекор се влегува во фаза на практично спроведување на оваа заштита.
