Министерот за односи меѓу заедниците Агон Ферати денеска се сретна со швајцарскиот амбасадор, Кристоф Сомер со кого разговараше за активностите на Министерството и проектите од заеднички интерес, соопшти Министерството за односи меѓу заедниците.
Во фокусот на средбата биле економскиот развој, како и можностите за продлабочување на соработката меѓу двете земји.
Посебно внимание било посветено на улогата на SwissCham во поврзувањето на швајцарските компании со компаниите од земјава, создавањето партнерства и можностите за нови инвестиции, како и организирањето B2B контакти и вмрежувањето на бизнисите.
На средбата било истакнато дека овие иницијативи, заедно со потенцијалот на дијаспората, можат да придонесат за зајакнување на економската соработка и создавање нови можности за двете земји. Се разговарало и за швајцарските развојни програми, поддршката за стартап-компаниите и можностите за обука на студентите.
-Министерот Ферати му се заблагодари на амбасадорот за континуираната поддршка од страна на Швајцарија во различни области, вклучително и економијата, земјоделството, невладините организации и обуките – се додава во соопштението.
