Почна жетвата на ориз во Кочанско. Првите комбајни влегоа во нивите во Зрновци. Но, новата жетва не донесе олеснување за оризопроизводителите. Стравуваат дека намалените приноси поради плевелот, нерентабилната цена и нерешениот откуп и овој пат ќе им го изедат трудот. Поради неефикасните препарати за заштита од плевели, просото доминира на оризовите површини, поради што очекуваат приноси од едвај 300 до 350 килограми по декар.
„Околу 40% се под површините под плевел, бидејќи тоа е резултат, како што кажавме, на онаа касна сеидба, касно пуштање на водата, касно третирање, препарати неефикасни. И тоа е резултат на она што сега го имаме на теренот, дека плевелот, просото, кое е најдоминантно во оризовата површина, и ние сега се бориме со него. Но, годинава доминира веќе на оризот“, изјави оризопроизводителот Тони Максимов.
Неефикасните препарати се причина зошто оризопроизводителите бараат државата конечно да им дозволи на регистрираните земјоделци сами да си ги увезуваат заштитните средства. Дополнително, бараат итно изготвување на посебен правилник со кој ќе се регулира откупот и продажбата на белиот ориз, како и дефинирање на нова производна цена, бидејќи сегашната не може да ги покрие основните трошоци за сеидба.
„Нашите барања беа следните, 4.800 денари за реколта 2025 да ни се исплатат во најкраток можен рок, како и изготвување на нова производна цена додека жетвата нема започнато, но, за жал, уште не е направено тоа“, вели оризопроизводителот Здравко Арсов.
Годинава под ориз во Кочанско се посеани околу 4.000 хектари. Сè уште се прават анализи колку ќе изнесува овогодишната реколта, но според оризопроизводителите, првичните проценки покажуваат дека таа ќе биде значително полоша во споредба со минатите години.
