Сметководството да ги следи глобалните трендови и да се дигитализира. На Втората регионална конференција, од Институтот на сметководители велат дека овој процес мора да биде пропратен со нов софтвер во државните институции кадешто се доставуваат извештаите. Воведувањето на вештачката интелигенција во овие процеси, новите алатки за обработка на голем обем на податоци, можностите за советување при управувањето со финансии треба да ги привлечат младите повеќе да се заинтересираат да станат сметководители – велат од Институтот на сметководители.
Инаку, Институтот се соочи и со обвинувања од страна на дел од сметководителите кои критикуваа дека неосновано им биле одземени лиценци, дека се фаворизирале одредени консултантски куќи за вршење обуки, дека поскапувала членарината, без подобрување на услугите што ги добиваат. Од Институтот велат дека сите постапки биле согласно законските регулативи.
Инаку дел од сметководителите имаа и протест во февруари пред Министерството за финансии, на кој се појави и министерката. Таа тогаш рече дека остварила средба со двете страни. Дури 3.000 сметководители беа времено избришани од регистарот поради што не можеа да ги потпишуваат годишните сметки за 2024 година. Експресно беа донесени измени на Законот за вршење сметководствени работи, со кои овластените сметководители на кои им е изречена дисциплинска мерка од Институтот за времено бришење од регистрите поради неисполнета обврска за континуирано професионално усовршување, можат да продолжат да вршат сметководствени работи, а неисполнетите часови за обуки да ги завршат до крајот на 2026-та година.
