Објавен е огласот за избор на нов претседател на Државната комисија за спречување на корупцијата, по оставката на осомничената екс-претседателка Татјана Димитровска.
Рокот за пријавување ќе трае 10 дена. Претседателот на Собранието, Африм Гаши, на последниот брифинг со новинарите рече дека локалните избори ќе ги распише во првата половина на август, односно во последниот рок за да евентуално се избере нов претседател пред гласањето.
Кандидатите за претседател на ДКСК, освен основните услови, треба да имаат најмалку 10 години искуство, од кои најмалку осум во областите на откривање или спречување на корупцијата, а воедно и да не им е изречена забрана за вршење професија и во последните 10 години да не биле пратеници.
Инаку, поранешната претседателка на Антикорупциската комисија, Димитровска, си поднесе оставка откако Обвинителството обелодени дека ја гони по два основи – за оддавање службена тајна и компјутерски фалсификат. Таа се товари дека му кажувала информации за предмети на екс-директорот на ТЕЦ Неготино, Небојша Стојановиќ, а потоа од вештачењето на телефоните обвинителите откриле дека друг ревизор полагал во нејзино име за да добие сертификат за службена тајна.
