Чекор поблиску до Европската Унија преку реформи во локалната самоуправа. На 26иот состанок на заедничкиот консултативен комитет меѓу Македонија и комитетот на регионите на Европската Унија, претставници на македонските општини заедно со 8 нивни колеги од земјите членки разговараа за клучни прашања околу подобрување на стандардот на живеење на граѓаните. Градоначалникот на Скопје ја истакна важноста на улогата на реформите во локалната самоуправа како клучни за пристапувањето кон европското семејство посочувајќи дека главната цел е достигнување на европските стандарди независно од околностите.
„Европската Унија ние треба, од друга страна пак како локална самоуправа, да им ја донесеме на граѓаните дома. Тоа значи да живеат во слични или исти услови како во земјите членки и општините од Европската Унија. Да имаат уредени градинки, уредени училишта, патна инфраструктура, подземна инфраструктура согласно она што го имаат нашите пријатели од Европската Унија и на тој начин да ги спроведуваме реформите дома“, изјави Орце Ѓорѓиевски, градоначалник на Скопје
Хрватските колеги од локалната самоуправа изразија силна поддршка за работата на македонските општини и патот кој треба да се помине. Тие потсетија дека и Хрватска поминала низ тежок процес на реформи.
„Ние, Хрватска, како последните што пристапиле во ЕУ имаме одредено искуство и сакаме да им помогнеме на нашите пријатели во Македонија на тој пат. Од наше искуство и ние исто така сме поминале низ еден долг пат и самите преговори и се чинеше како тоа никогаш да нема да заврши. Но меѓутоа еве денес можеме да кажеме дека благодарејќи на пристапувањето во ЕУ Хрватска стана доста подобра држава“, изјави Иван Гулам, градоначалник на Пировац, Хрватска
Состаноците на заедничкиот консултативен комитет се одржуваат два пати годишно, претходно оваа година состанокот се одржа во Брисел а сега во Скопје. Целта на овие состаноци е локална подготовка за реформите потребни за пристапување и размена на добри практики.
