Со полна акумулација Калиманци и функционална каналска мрежа, годинава започнува наводнителната сезона во Кочанската Котлина. По повеќе од една деценија, со специјална механизација целосно е исчистен каналот за наводнување во селото Спанчево, со што ќе се обезбеди сигурен проток на вода кон земјоделските површини. Каналот е долг 11,4 километри, со капацитет од 36 кубни метри вода.
Со неговото расчистување не само што ќе се подобри водоснабдувањето, туку и ќе се намали опасноста од поплави по обилните дождови. Од Водостопанство велат дека годинава приоритет ќе биде рационалното управување со водните ресурси.
„Сега императив ни е да ја завршиме сезоната со една третина повеќе вода од минатата сезона. Годинава нема да има непотребно испуштање на водата. Во пресрет на климатските промени и хидрологијата, не знаеме каква ќе биде, затоа да ја чуваме таа акумулирана вода во акумулацијата“, изјави Филип Филиповски, директор на АД „Водостопанство“ на Македонија.
Последен пат каналот за наводнување бил исчистен во 2011 година. Надлежните апелираат месното население одговорно да се однесува и да не фрла смет и шут, со цел да не се повтори состојбата од изминатите години. Од Општина Чешиново-Облешево најавија дека потегот покрај каналот во селото Спанчево, во наредниот период ќе биде хортикултурно уреден.
„Имаме идеја, во соработка со Водостопанство и со мислења од Министерството за земјоделство, да пристапиме кон изградба на кеј. Со ова, овој потег кој претставуваше сериозен проблем за време на поројните дождови, сега да претставува една убава слика, а не проблем“, изјави градоначалникот на Чешиново-Облешево, Јорданчо Костадинов.
Од Водостопанство потенцираат дека поројните дождови ја наполнија акумулацијата Калиманци, што значи дека наводнителната сезона ќе започне навреме. Водата за наводнување ќе биде пуштена согласно потребите на земјоделците и во зависност од културите што ќе се одгледуваат.
