Сомнеж за финансиски неправилности е причина за смена на директорите во двете детски градинки во Штип. Градоначалникот Иван Јорданов го разреши досегашниот директор на најголемата детска градинка во градот, „Астибо“. На негово место доаѓа директорката на другата градинка, која ќе има задача од Државниот завод за ревизија да побара детална финансиска анализа, со која ќе се утврди како работело досегашното раководство. Јорданов вели дека причината за ваквиот чекор е незадоволството од досегашното работење, но и сомнежите за евентуални неправилности.
„Причина за оваа промена во раководствата на детските градинки е моето лично незадоволство од досегашното работење на досегашниот директор на градинката „Астибо“ и сомнежот во неговото финансиско работење. Чекорите што ќе бидат преземени во периодот што следи се новото раководство да направи комплетна ревизија на досегашното работење, со пријава до надлежните институции, до Државниот завод за ревизија“, изјави градоначалникот на Штип, Иван Јорданов.
Јорданов порача дека нема да толерира неодговорно однесување од ниту еден функционер на локално ниво и побара од директорите одговорно да работат и совесно да се однесуваат кон функциите што ги извршуваат.
„Нема да дозволам неодговорно однесување на ниту еден функционер на локално ниво, затоа што сите ние имаме одговорност да бидеме сервис на граѓаните и одговорно да се однесуваме кон позициите што ги носиме. Во периодот што следи очекувам новите раководства на детските градинки да продолжат во насока на рационализација и оптимизација на трошоците и ресурсите со кои располагаат“, изјави градоначалникот на Штип, Иван Јорданов.
Јорданов засега не открива детали за, како што вели, сомнежите за финансиските неправилности. Посочува дека станува збор за целиот период додека директорот раководел со институцијата, но додава дека утврдувањето на евентуална одговорност го остава на надлежните институции.
