Тројца загинати и најмалку 13 повредени е билансот од силна експлозија што утрово одекна во осумкатна станбена зграда во населбата Рахова, Сектор 5 во Букурешт.
Најтешко се погодени петтиот и шестиот кат, кои целосно се урнале. Меѓу жртвите е и 24-годишна бремена жена, пронајдена под урнатини. Повредените, меѓу кои и две деца, се пренесени во неколку болници во главниот град.
Првичните сомнежи упатуваат на истекување на гас како причина за експлозијата. Станари пријавиле мирис на гас уште вчера, но утрово тој повторно се почувствувал – непосредно пред трагедијата.
Зградата е во критична состојба и целосно е евакуирана, заедно со блиското средно училиште „Димитрие Болинтинеану“. Активиран е Црвениот план за интервенција, со повеќе од 10 противпожарни и итни екипи на терен.
