Со европски пари, Штип ќе ги разеленува запуштените површини. Од денес започнува изградбата на еден од трите паркови, со кои градот под Исарот ќе добие повеќе од еден хектар нови зелени површини. Нивната изградба ќе чини околу 280.000 евра, средства обезбедени преку проект од ИПА3 програмата за меѓугранична соработка.
„Започнуваме во населбата 8ми Ноември веднаш до пешачката патека. Станува збор за една површина која досега беше неуредена, запоставена. Сега граѓаните ќе може да релаксираат и да го поминуваат своето време. Исто така е предвидено паркови и на уште две локации“, изјави Иван Јорданов, градоначалник на Штип.
Во проектот „Трансформирање на урбаните делови со зелена инфраструктура„ партнер на Штип, е градот Гоце Делчев во Бугарија. Тамошната локална самоуправа ќе го уредува плоштадот „Македонија“.
„Кај нaс ќе биде обновен и реконструиран плоштадот „Македонија“, односно просторот пред Домот на културата како и целиот парк. Зелената инфраструктура е веќе застарена и има потреба од нејзино обновување“, изјави Владимир Москов, градоначалник на Гоце Делчев, Бугарија.
Проектот чини околу 860.000 евра и треба да се реализира во рок од 24 месеци. 15% од средствата се кофинансирани од Министерството за локална самоуправа.
„Очекувањата од овој проект се заштита на животната средина, поголема зелена површина и отварање на нови работни места“, изјави Стефан Ангелски од Министерството за локална самоуправа.
„Центарот за развој на Источно планскиот регион како партнер во овој проект ќе има за задача да изготви стратегија за зелена инфраструктура за двете општини и Акционен план за реализирање на активностите“, изјави Трајче Здравков, дир. на ИПР.
Преку ИПА програмата, двете општини Штип и Гоце Делчев ќе работат и на јакнење на туристичките понуди. Во Штип, е предвидено на една од куќите, кои градот ги доби како подарок од д-р Жан Митрев да и се врати стариот лик, архитектура крактеристична за штипско Ново Село.