По првичниот шок од трагедијата во Кочани, сега почнува периодот на тага. Учениците кои во пожарот во дискотеката „Пулс„ изгубија соученици, другари, роднини се соочуваат со панични напади и анксиозност.Психологот Емилија Бошковска, која е дел од тимот кој во групни сеанси работи со средношколците од овој регион, вели дека кај дел од учениците во Штип, Кочани, Облешево, Виница и Пробиштип се забележани и емоции на лутина.
„Ова е колективна траума и кај секој е различно и во различен степен засегнат. Не можам да кажам дека ни еден од жителите на овој регион, па и во Македонија не е афектиран од сето ова. Сите ние сме афектирани. Секој со своето темпо ќе заздравува. Народски кажано имаме седум дена, четириесет дена од тагувањето, но ниедно правило во овој момент не може да биде валидно за сите„ изјави Емилилја Бошковска, од Комората на психолози.
Во моментот на терен волонтерски работат 130 психолози, над 30 од нив се во Кочани. Бројот на волонтери постојано се зголемува , а сите претходно поминаа обука за постапуваање во оваа кризна ситуација, изјави министерката за образование, Весна Јаневска која го посети средното медицинско училиште „Јане Сандански„ во Штип, каде што во еден клас има тројца починати, а во друг неколкумина се повредени. Освен психо-социјална поддршка, важен аспект на кој министерството ќе посвети внимание е одржување на безбедносните стандарди во сите училишта низ државата.
„МОН, минатата недела испрати писмо до општините и државните училишта да се направи дополнителна проверка на безбедносните системи, односно да се види дали има проценка на ризик од катастрофа, дали има план за справување со катастрофи и дали опремата која е потребна како ППЕ апарати, хидрантни и друга опрема ја има во училиштата. Од ЗЕЛС разбравме дека најголем дел од училиштата ги содржат сите овие елементи„ изјави министерката за образование, Весна Јаневска.
Во рамки на Универзитетот, во Штип е отворен и Центар за младинско советување, кое е збирно место на психолозите кои работат на терен. Овде сите граѓани и ученици кои ценат и имаат потреба од разговори може слободно да се обратат и да добијат насоки како да се изборат со трагедијата. Од Комората на психолози, повикаа и останатите колеги да се вклучат во акцијата и да помогнат во надминувањето на оваа колективна траума.
