Вкупната вредност на донацијата изнесува 286.120 денари, а средствата се обезбедени исклучиво преку донации од граѓани и компании кои континуирано ја поддржуваат иницијативата
Граѓанската иницијатива „Сапорт Кочани“ донираше медицинска опрема за третман и рехабилитација на повредените од трагичниот настан што се случи на 16 март 2025 година во кабаре клубот „Пулс“ во Кочани. Донацијата е формализирана преку договор со Универзитетската клиника за пластична и реконструктивна хирургија.
Донацијата вклучува 100 комплети T-LAB PRP KIT, 10 комплети EXOMINE SMART KIT, 4 пакувања аминокиселини и 4 пакувања протеини.
Вкупната вредност на донацијата изнесува 286.120 денари, а средствата се обезбедени исклучиво преку донации од граѓани и компании кои континуирано ја поддржуваат иницијативата.
Материјалите се наменети за третман и регенерација на кожата, забрзување на зараснувањето на рани, како и подобрување на опоравувањето кај пациентите со тешки изгореници. Нутритивната поддршка ќе помогне во зајакнување на организмот за време на процесот на рехабилитација.
Тимот на „Сапорт Кочани“ ја посети Клиниката, каде лично им изрази поддршка на пациентите кои сè уште се хоспитализирани, посакувајќи им брзо закрепнување.
„Продолжуваме со фокусирана, директна и одговорна поддршка за секој поединец кој е засегнат од трагедијата. Оваа соработка со една од клучните здравствени установи во државата претставува значаен чекор во обезбедувањето стручна медицинска нега. Искрено им благодариме на сите хумани граѓани, компании и поддржувачи – токму тие ја направија оваа помош возможна,“ велат од иницијативата.
Од „Сапорт Кочани“ нагласуваат дека остануваат посветени на транспарентност, институционално партнерство и долгорочна грижа за сите погодени од трагичниот настан.
