Успешно тече рехабилитацијата на повредените во дискотеката Пулс, во одмаралиштето на МВР, во Пониква. По направените контроли, физијатрите утврдиле дека кај добар дел од младите луѓе веќе се враќа моториката, односно движењата. Првата група останува до крајот на неделата, а се прават напори по нивно барање некој да продолжат и со втората група. Рехабилитацијата на Пониква, добро влијае и на нивната ресоцијализација, објаснува д-р Катерина Мирчовска, директорка на кочанската Општа болница.
„Освен физикална терапија имаме и психолошка поддршка што е во соработка со Комората на психолози на РМ. Има групна, но има можност и за индивидуална, што е на доброволна база… Еден од клучните аспекти е да се направи и ресоцијализација. Тие, веќе се чувствуваат комотно да се движат меѓу нив. Сите се со слични повреди. Добро оди и веќе се една голема и среќна фамилија„ изјави д-р Катерина Паниќ-Мирчовска, директор на ОБ-Кочани.
Во меѓувреме, интензивно се работи на реконструкција на Одделението за физикална терапија, во кочанската Општа болница. Се работи во две смени, седум дена во неделата и се очекува во најскоро време, градежните активности да завршат и одделението да почне со работа.
„Досега е сменета електричната инсталација, водоводната и канализациона мрежа, поставени се нови прозорци. Остануват уште ѕидовите и подовите„ изјави д-р Катерина Паниќ-Мирчовска.
Реконструкцијата на Одделот за физикална терапија, започна на 13 овој месец, со цел да се обезбедат подобри услови за лекување и третман на повредените во дискотеката Пулс. Со проектот се предвидува реновирање на одделенијата за хирургија, гинекологија и неврологија, како и набавка на нова апаратура.
