По тешкиот период кој ја погоди заедницата, Психолошкиот центар „Алтернатива“ продолжува со создавање безбеден и доверлив простор за психо-едукативна поддршка и зајакнување.
Во рамки на иницијативата „Простор за поддршка“, организирана од Психолошкиот центар „Алтернатива“ – дел од Групацијата, со поддршка од „ДМ Македонија“, започнува нов циклус од шест затворени психо-едукативни работилници во Кочани.
Работилниците се наменети за професионалци кои работат со луѓе, лица кои директно или индиректно се погодени од траума или загуба, како и за сите кои чувствуваат потреба од дополнителна поддршка и ментално зајакнување.
Сесиите ќе се одржуваат секоја сабота, од 8 ноември до 20 декември, во период од 11 до 13 часот, во Градската библиотека во Кочани. Работата ќе се реализира во две паралелни групи – група на возрасни и родители и група на професионалци, со најмногу 15 до 16 учесници, за да се овозможи доверба, стабилност и длабочина во процесот.
Работилниците ќе ги водат системски и семејни советници и психотерапевти од Психолошкиот центар „Алтернатива“, специјализирани за работа со трауми, загуби и ментално здравје. Дел од циклусот ќе биде реализиран и со примена на ЕМДР пристап – метод за третман на трауми, анксиозност и загуби.
Учесниците ќе имаат можност да добијат поддршка во справувањето со личните и професионалните последици од траума, да научат алатки за самопомош, емоционална стабилност и резилиентност, како и да се поврзат со други кои минуваат низ слични искуства.
Бројот на места е ограничен, а пријавувањето се врши преку телефонскиот број 078 313 306 (контакт: Кристина).
Организаторите порачуваат: „Не си сам/а. Твоето место е тука.“
