Пролонгиран рокот за завршување на меѓународниот тендер за избор на градежна компанија што ќе треба да ја гради Регионалната депонија, кај светиниколско Мечкуевци. Постапката којашто денеска требаше да заврши, а јавно да се отвори на 25 февруари поради технички проблем е одложена, информираат од Министерството за животна средина. Уште колкав роk, ќе им се даде на компаниите за да може да аплицираат, засега е неизвестно, во телефонски разговор за Алфа, објаснува раководителката на Секторот за управување со отпад, Ана Каранфиловска. Со изградбата на депонијата ќе се реши пролемот со депонирање и обработка на отпадот од целиот Источен и Североисточниот регион, а во наредниот период сите општини кои се вклучени во проектот треба да покажат сериозност и навремено решавање на обврските, вели преседателот на Советот на градоначалници на ИПР и градоначалник на Зрновци, Борчо Коцев.
„Изградбата на регионалната депонија значи и трајно решавање на проблемите со дивите депонии. Ова е завршна фаза од имплементацијата на европскиот проект и сите ние во наредниот период што следи треба да покажеме сериозност и навремено решавање на оние обврски на секоја општина поединечно. Крајна цел е оставање на животна средина за идните генерации„ изјави Борчо Коцев, градоначалник на Зрновци и претседател на Советот на градоначалници на ИПР.
Со отпочнување на проектот, општините Зрновци, Чешиново-Облешево и Виница беа принудени да ги затворат своите депонии, а отпадот да го носат во Кочани. Ваквите насоки, на нозе ги крена и тамошните еко активистите кои речиси месец дена не дозволуваа пристап до кочанската депонија, која во минатотот често гореше и го загадуваше воздухот. Сега за нејзино одржување плаќаат и трите општини.
„Ние трите општини се задолжуваме да плаќаме месечен надоместок во висина од 220денари по кубик собран и депониран отпад на територијата на Кочани. Од страна на ЈП„Водовод„-Кочани и поддршка на МЖС, веќе се обезбедени средства и е ангажиран економски оператор. На дневна основа се уредува целата таа површина, а проблемите кои беа до пред некој месец се надминати„ изјави Борчо Коцев, градоначалник на Зрновци и претседател на Советот на градоначалници на ИПР.
По завршувањето на целата постапка, фабриката треба да биде готова за две и пол години. Но, и покрај ветувањата дека отпадот ќе се третира по сите европски стандарди, светиниколчани и понатаму цврсто остануваат на ставот и не дозволуваат изградба на депонија во нивниот регион.
