Приближно 150 литри дожд на квадратен метар во невремето во Атина

Во големото невреме што во средата попладне го зафати поширокиот регион на Атина, биле регистрирани големи количини дожд, кои во една населба достигнале 173,8 литри вода на квадратен метар, што е речиси трипати повеќе од месечниот просек на дожд во грчката метропола. Според метеоролозите, во Грција, во Атина, во зимскиот период количината дожд на месечно ниво е 50–60 литри на квадратен метар. Во силното невреме во Атина животот го загуби 56-годишна жена, во обид пеш да ја помине поплавената улица. Поројниот дожд предизвика и материјална штета, а од вчера во двете атински општини што беа најпогодени е прогласена вонредна состојба.