Износот за концесиски надоместоци од Булмак 2016 за четирите општини Пробиштип, Крива Паланка, Кратово и Македонска Каменица, само за првите девет месеци од 2025 година изнесува 45.420.255 денари.
Како што соопштија од компанијата што ги управува рудниците „Злетово“ и „Тораница“, во првите девет месеци од 2025 година плати вкупно 58.231.096 денари концесиски надоместоци. Согласно законската распределба од нив 22 отсто се слеваат во државниот буџет, односно 12.810.841 денари и останатите 78 отсто или 45.420.255 денари се слеваат во буџетите на Пробиштип, Крива Паланка, Кратово и на Македонска Каменица.
-Нашата одговорност се гледа и во бројки и во доверба. Во првите девет месеци од 2025 година пресметавме 58.231.096 денари за концесиски надоместоци, од кои значаен дел се слеваат во четири локални буџети. Тоа се средства за улици, училишта, спорт и услуги што граѓаните ги користат секој ден. Ќе продолжиме со транспарентна комуникација, инвестиции во безбедност и модернизација на нашите рудници и со цврсто партнерство со заедниците во кои работиме, изјави Тони Тоневски, директор на „Булмак 2016“.
Компанијата со навремена исплата на средствата, се наведува, ја покажува и општествената одговорност кон локалната заедница.
-Средствата на локално ниво се распределуваат во четири општини каде што компанијата има активности. Општина Пробиштип добива 21.694.615 денари, Крива Паланка – 21.817.460 денари, Кратово – 1.384.763 денари и Македонска Каменица – 523.417 денари. Овој прилив ја нагласува регионалната важност на работењето на рудниците Тораница и Злетово како стабилен извор за финансирање на општински проекти во инфраструктурата, образованието, спортот и јавните услуги, се наведува во соопштението.
„Булмак 2016“, се додава, останува посветен на навремено исполнување на сите законски обврски и на отворена комуникација со јавноста.
-Комбинацијата од стабилно производство и предвидливи уплати создава поголема сигурност за локалните буџети и дополнителен простор за развојни проекти на регионално ниво. Во фокусот на компанијата се безбедноста, ефикасноста и општествена одговорност, со континуирани инвестиции во технологија, модернизација и мерки за заштита на животната средина, во партнерство со локалните заедници, стои во соопштението.
