Македонската Влада ги проширува активностите во насока на економско поврзување на државата со нови пазари и привлекување инвеститори. Како најново, во фокусот се Обединетите Арапски Емирати каде патува висока владина делегација предводена од премиерот Христијан Мицкоски. Заедно со него, во македонската делегација се и вицепремиерот и министер за транспорт Александар Николоски, министерот за надворешни работи и надворешна трговија Тимчо Муцунски, генералниот секретар на Владата Игор Јанушев, како и директорот на Дирекцијата за технолошко индустриско развојни зони Гоце Димовски, националниот координатор за туризам Акан Махмут и претставници на неколку државни институции.
Во рамки на официјалниот работен престој во Обединетите Арапски Емирати, премиерот Христијан Мицкоски и владината делегација ќе остварат средба со претседателот кој воедно е и владетел на Емиратот Абу Даби, шеикот Мухамед бин Зајед Ал-Нахјан, на чии покана и се остварува оваа посета.
Премиерот Мицкоски ќе оствари средба и со шеикот Мохамед бин Рашид Ал Мактум, владетел на Дубаи, потпретседател и премиер на ОАЕ.
За време на посетата, планирани се повеќе средби на највисоко ниво, како и средби со развојниот холдинг на Абу Даби, со државната „Мубала“ инвестициска компанија, како и „Масдар“ – државната енергетска компанија, како и средби со неколку стопански комори, со цел разгледување на можности за соработка во инфраструктурни проекти, инвестиции во агро-бизнисот, обновливи извори на енергија, туризмот, иновации и современа технологија.
