Пожарот во облакодерот „Вјесник“ во Загреб е ставен под контрола. Засега е видлив само чад од огнената стихија што се проширила вертикално преку вентилациските отвори, зафаќајќи неколку ката, поради што голем број пожарникари и опрема беа распоредени за да го изгаснат.
Внатрешната интервенција беше прекината поради зголемен ризик. Засега нема информации за причините за пожарот и не се пријавени повредени лица. Во моментот на несреќата во објектот немало луѓе.
„Она што беше многу опасно беше тоа што кога екипите почнаа да се искачуваат за да го изгаснат пожарот на врвот од зградата, огнот почна да се појавува на долните ката; на петтиот и шестиот, па дури и на приземјето – што покренува сомневања дека причината може да биде поврзана со инсталациите на зградата. До 6 часот наутро денес, 30 возила поминаа низ локацијата, некои од нив логистички, а беа вклучени околу 80 пожарникари, професионални и волонтери“, изјави Синиша Јембрих, командант на загрепската противпожарна служба.
„Пожарот избувна кратко по 23 часот, причината сè уште е непозната. Постојат сомневања, но истрага треба да ја утврди точната причина. Знаете дека облакодерот Вјесник е еден од најголемите и најистакнатите објекти во Загреб, но за жал целосно е оштетен, како однадвор, така и одвнатре. Инженерите ќе мора да утврдат дали армирано-бетонската конструкција е погодна само за рушење или е можно и реконструирање“, изјави Горан Томашевиќ, градоначалник на Загреб.
Истрагата е во тек, а надлежните ќе проценат дали огнот ја уништил конструкцијата на зградата.
