Спречена експлозија на метан во Кочанско. Пожарникари успеале брзо да го совладаат пожарот кој избувнал во пречистителната станица за отпадни води во селото Мојанци. Пламените јазици се појавиле на инсталација на системот за пренос на гасот, при што се запалиле цевки од системот.
„Ние добивме дојава за пожар во 20:30 часот од лице вработено во пречистителната станица во Мојанци дека има запалена инсталација на преработка на сулфур, за преработка на метан. Реагиравме веднаш со четири возила и осум пожарникари. Со нас беше и возило од ДПД. Пожарот од наша страна брзо е локализиран и изгаснат“, изјави Драган Апостолов, командир на кочанската ТППЕ.
Пожарникарите не можат да направат проценка колкава штета би се предизвикала ако експлодирал метанот.
„Не можам да кажам колкава е опасноста. До самата преработка на сулфорот постои еден голем балон, кој со преработка на сулфур од пречистителната станица се полни со метан. Беше голем пожарот, со сериозен карактер“, изјави Драган Апостолов, командир на кочанската ТППЕ.
Има само материјална штета, а причините за пожарот допрва ќе се утврдуваат.
Командирот апелира да не се пали оган на отворено во близина на пречистителната станица, каде што има земјоделско земјиште.
