Повеќе од 330 портали, телевизии, радија и весници се пријавиле за да земат дел од платеното политичко рекламирање за локалните избори.
Од Државната изборна комисија велат дека списокот не е конечен бидејќи барањата се проверуваат, а исто така вечерва на полноќ истекува и рокот за доставување на ценовниците. Според роковникот на ДИК, ценовниците треба да се потврдат и објават на веб-страницата на ДИК најдоцна на 24 август.
Во однос на структурата на медиумите, најмногу од пријавените се интернет портали – дури 257, потоа 43 радиостаници, 33 телевизии и осум печатени медиуми. Од ДИК велат дека овие барања подлежат на проверка од страна на службите во Комисијата, затоа бројката не може да се смета за дефинитивна.
Појаснуваат дека печатените медиуми и електронските медиуми – интернет порталите, се должни ценовниците за платеното рекламирање да ги достават до ДИК, Државниот завод за ревизија и Државната комисија за спречување на корупцијата во рок од пет дена од денот на распишувањето на изборите.
