Поранешниот француски претседател Никола Саркози влезе во затвор во Париз, откако судот го осуди на пет години затвор за добивање средства за изборна кампања од режимот на покојниот либиски водач Моамер ел Гадафи. Саркози, кој беше претседател на Франција меѓу 2007 и 2012 година, е првиот поранешен лидер на земја од ЕУ што отслужува затворска казна и првиот француски повоен лидер кој завршува во затвор.
Саркози, заедно со сопругата Карла Бруни, ја напушти својата куќа во придружба на полицијата, а на социјалните мрежи објави дека „невин човек е затворен“. Пред неговиот дом се собраа стотици поддржувачи кои го скандираа неговото име и ја пееја француската химна. Саркози, кој има 70 години, ќе биде сам во ќелија поради безбедносни причини. Неговиот адвокат истакна дека затворот само ја зголемува неговата решеност да докаже дека е невин. Во пресрет на заминувањето во затвор, Саркози бил примен од актуелниот претседател Емануел Макрон во Елисејската палата.
