Невремето предизвика хаос и во Грција. Морето се излеа во Солун, додека бура и силни дождови ги погодија Крф, Лезбос и Хиос, оставајќи зад себе поплавени улици, паднати дрвја и прекини на струја.
Морето се искачи за половина до еден метар и за неколку минути ги покри шеталиштата во населбата Каламарија во Солун. Видео-снимките покажуваат како водата навлегува во деловни простории, паркинзи и крајбрежни патишта, без силен ветер и без дожд. Некои сведоци велат дека водата „го преминала брегот“ за само неколку минути. Покачувањето предизвикало краткорочен сообраќаен хаос. Нема официјална проценка на штетата, но општината веќе побара прогласување вонредна состојба.
Силни врнежи ги погодија и островите Лезбос и Хиос. Жителите внимателно ги следат предупредувањата, а локалните власти апелираат на претпазливост поради можни нови нестабилности.
Островот Крф беше погоден од силна бура. Грчката ЕРТ објави дека ветровите оштетиле покриви, собориле дрвја и предизвикале прекини на струја. Торнадо однесе киоск и ќерамиди од куќи и деловни објекти. Пожарникарите и цивилната заштита интервенираа во северниот дел на островот.
