Густата магла во скопската котлина и вечерва предизвика откажување и доцнења на летовите од Меѓународниот аердором Скопје, а намалена е видливоста и на дел од од патните правци.
Според информациите од веб страницата на ТАВ Македонија, откажани се вечерните летови од и за Истанбул и Цирих, за Франкфурт, а дел од останатите летови се со статус за задоцнето полетување и слетување. Претходно аеродромскиот оператор соопшти дека поради маглата во периодот од 00:00 часот на полноќ до 12 часот денеска напладне, авиокомпаниите откажале 20 лета, пренасочиле еден лет, а 11 часот слетале авионите од Дортмунд и од Виена. Вчера од 00:00 часот до 18 часот, како што информираа од ТАВ Македонија имало 16 откажани и 11 пренасочени летови, додека три авиони слетале и три авиони полетале после пладне, кога се подобриле временските услови.
Од АМСМ, пак, во извештајот за состојбата на патиштата во 18 часот вечерва информираа дека сообраќајот на државните патишта се одвива непречено, по претежно суви коловози. Намалена видливост поради појава на магла до 30 метри има на патниот правец Жировница – Луково, а до 150 метри во околината на Тетово, Штип, Петровец и Демир Капија, соопшт АМСМ, потсетувајќи дека во сила е законската обврска за задолжително поседување на зимска опрема во возилата, без оглед на моменталната временска состојба.
УХМР најави дека до крајот на денов по котлините ќе се задржи магливо. Појава на магла ќе има и утре по одделни котлини, исто така и задутре кога кон крајот на денот и во следните денови под влијание на серија влажни воздушни бранови ќе има повремени локални врнежи од дожд, наместа пообилни. Поради спуштање на постуден воздух од север на планините и на некои од повисоките места врнежите ќе преминуваат во снег.
