Анализата на цените на основните прехранбени производи ќе покаже дали има потреба од носење мерки за заштита на животниот стандард на граѓаните. Извештајот на Државниот пазарен инспекторат кој го подготви Министерството за економија се разгледува на владина седница и по негово детално проучување, Владата ќе ги знае следните чекори кои ќе ги преземе. Дел од мерките кои се разгледуваат како можни опции се намалување на ДДВ-то на основните производи и ограничување на профитната маржа на трговците.
„Очекувам да го добијам извештајот и да го анализираме овие денови многу внимателно и дури тогаш ќе излеземе со одредени мерки. Сакаме тие овој пат да бидат микротаргетирани“ – вели Христијан Мицкоски – претседател на Влада.
Опозицијата неосновано обвинува дека Владата доцни со мерките – дециден е премиерот. Наведува дека Македонија прва посегнала по намалувањето на ДДВ-то кај горивата од 18 на 10%. Токму оваа мерка е една од сетот кој Европската Комисија ќе го разгледува за државите членки да го применат во најкраток можен рок.
„Сега гледаме дека претседателката на Европската комисија тоа јавно го говори дека сите земји членки на Европската унија треба да ги намалуваат даноците на додадена вредност за дизел горивата и бензините затоа што екстремно се високи цените на овие производи. Така што, дури и овие параметри не им одговараат на СДСМ „во земјата на лагите“ – рече Христијан Мицкоски – претседател на Влада.
Инаку, Државниот пазарен инспекторат досега направил контроли во над 800 продажни места. Инспекторите направиле проверки на производители, увозници, дистрибутери, локални продавници и ланци на маркети. Се проверувале цените на основните прехранбени прозиводи, средства за лична хигиена, средства за чистење, како и детска и бебешка храна и други детски производи. Анализата треба да покаже дали и колку тие поскапеле на почетокот на април, споредено со февруари годинава. Бизнисот и аналитичарите бараат построги контроли и секторски и таргетрирани мерки.
