Синдикатите го притиснаа новиот министер за економија и труд Бесар Дурмиши за повисоки плати. Нивното барање за пораст на минималната плата на 450 евра во првите 100 дена од новата Влада ќе биде прва точка за расправа на првата седница на новиот состав на Економско-социјалниот совет. Дурмиши вели дека тој како нов претседавач со советот ќе разговара за ова со сите заинтересирани страни и со работниците и со газдите. Засега нема најави дали за покачување на минималните плати во администрацијата би се нашле пари со ребаланс на буџетот.
„Во рамките на економско-социјалниот совет, со кој сега ќе претседавам јас како министер за економија и труд, кое е највисоко тело составено од претставници и од синдикатите, и од работодавците, и од Владата, ќе почнеме дијалог за сите отворени прашања и од страна на синдикатите и од страна на работодавците. Со реорганизацијата што се прави сега со новата Влада ќе се формираат нови членови и ова прашање на првиот состанок ќе биде ставено на маса за дискусија. Како Влада од особено значење ни е социјалниот дијалог, односно вклучување на сите засегнати страни при креирање на новата мерка за ова прашање. Мора да ги имаме предвид интересите на работниците, но и интересите на бизнис-секторите“ – рече министерот Дурмиши.
Синдикатите не отстапуваат од барањата. Алармираат дека минималецот во Македонија е најмал во регионот. Бараат раст на платите веднаш.
„Сведоци сме дека платите на работниците се зголемуваат минорно, со забавено темпо и несоодветно на инфлацијата и зголемените трошоци на живот или воопшто не се зголемуцваат, а функционерите си обезбедија пораст на платите од енормни и незаслужени 78%“ – велат од ССМ.
Дурмиши ветува и дека ќе работи на забавување на инфлацијата која во мај изнесуваше 4,5%. Ќе разговара со производителите и стопанските комори за да се изнајдат нови можности за справување со растечките цени. Очекувањата беа дека листата од 1.600 производи со намалени трговски маржи и Законот за нефер трговски практики од септември треба да ги дадат посакуваните ефекти за намалени цени на прехранбените производи. Засега не се знае дали оваа листа ќе биде проширена со нови производи.
Дурмиши најави и ревизија на досегашното работење на министерството коешто го презеде. Последната ревизија била направена пред 9 години.
