Минималните трошоци за живот на едно четиричлено семејство за два месеци се намалени за над илјада денари. Сојузот на синдикати на Македонија објави две минимални синдикални кошнички, што покажуваат дека трошоците во март биле помали за 1900 денари споредено со февруари. Во април пак има зголемување од 836 денари споредено со март годинава. Тенденција на намалување се забележува кај издатоците за храна и пијалоци од речиси две илјади денари во последниве два месеци. Од Синдикатот потврдуваат дека на семејствата им требаат помалку пари за храна и пијалоци додека траат мерките за ограничени маржи, но сепак сметаат дека тоа не е доволно. Затоа бараат поригорозни контроли за надзор на трговците кои ја злоупотребуваат мерката.
За храна и пијалоци на едно четиричлено смејство му требаат 21.480 денари месецов. Тоа е повеќе од третина од фамилијарниот буџет според пресметките на синдикатот. Оттаму велат дека калкулацијата на минималните трошоци е показател дека на Македонците не им стигнуваат ниту две и пол минимални плати за да го преживеат месецот и дека е оправдано барањето за зголемување на минималната плата на најмалку 500 евра, како и дополнително зголемување на сите останати плати за најмалку 100 евра.
Владата ќе креира просечна кошничка која ќе вклучува просечно тричлено семејство. Од министерството за економија веќе информираа дека кошничката е готова и е врз база на податоците од државниот завод за статистика и пазарен инспекторат. Што точно содржи засега нема конкретни детали, но се знае дека нема да има алкохол и цигари, а нема да биде ставена ставка за одмор во странство. Министерството за економија објасни дека владината кошничка ќе служи како урнек за креирање на мерки за заштита на животниот стандард.
