Почна жетвата на пченица во државата. Се очекува овогодинешната реколта на пченица да даде добар род и квалитетно зрно. Според првичните анализи во просек треба да се жнее околу 3.000 килограми на хектар. Но и покрај најавата за добар род, Македонија, повторно нема да ги задоволи потребите и ќе мора да увезува од странство.
„Очекуваме да имаме околу 160.000 до 180.000тони производство на пченица, а нашите потреби се многу поголеми, односно ќе немаме ни пола од она што ни е потребно и ќе мора да увезуваме„ изјави Ѓорги Каракашев, од Националната мрежа на земјоделци.
При крај е жетвата и на јачмен. Се жнеат од 300 до 350 килограми по декар. Јачменот се откупува по 9,5денари за килограм, а вчера министерот за земјоделство инфрмираше дека е постигната откупна цена за пченицата. Килограм ќе се откупува по нето цена од 12 денари.
„Сите оние кои во наредниот период ќе имат предавање на пченица од реколта 2024/2025 согласно кажаното принос и квалитет оваа година мелничарите ќе ја откупуваат пченицата од прва и втора категорија,во прва категорија, бидејќи како што потенцирав квалитетот е одличен. Откупната нето цена за пченицата ќе биде 12 денари, плус дополнителните трошоци кои следуваат „ изјави вчера министерот за земјоделство, Цветан Трипуновски.
За житопроизводителите оваа цена е неприфатлива, бидејќи е далеку пониска од производната цена изготвена уште во 2023 која се движи околу 19денари за килограм пченица. Од Националната мрежа, барат државата да интервенира во исплатата на разликата помеѓу производната и откупната цена. Во реколта 2024/2025 под житни култури се засеани 152.080 хектари, од кои 70.000 се со пченица.