Стабилна е состојбата на 69-годишниот штипјанец, кој вчера беше хоспитализиран поради повреди здобиени во големиот пожар над Штип. Од штипската Клиничка болница информираат дека пациентот е подобар, но поради изгореници и интоксикација од чад ќе остане под лекарски надзор и во наредните денови. Обидувајќи се да ја спаси викендицата од огнените јазици, се здобил со изгореници од втор степен на левата рака и потколениците. 69-годишниот маж во последен момент бил извлечен од опасната зона од страна на пожарникари и граѓани.
„Околу 13:30 часот почна да гори. Јас отидов со моторот, човекот беше внатре. Почна кровот да гори. Влеговме внатре и едвај жив го извадивме. Човекот со кофи истураше вода“, вели граѓанинот Методи Јованов, кој отишол на припомош на пожарникарите и доброволците.
По два дена интензивна борба со пламените јазици, состојбата во Штип е стабилизирана. Во гаснењето учествуваа пожарникари и членови на доброволни противпожарни друштва од Штип, Пробиштип, Кочани, Свети Николе и Кавадарци, кои пожртвувано се справуваа со огнот на тешко пристапниот терен. Со механизација се правеа обрачи за да се спречи огнот, а од воздух дејствуваше и воздухоплов на Дирекцијата за заштита и спасување.
„Опожарувањето е во непосредна близина на десетина викенд-куќи и, од она што го имаме како информација, нанесена е штета на три викенд-куќи и едно лице е повредено. Тој е сопственик на една од викенд-куќите“, изјави Иван Јорданов, градоначалник на Штип.
Од Дирекцијата за заштита и спасување посочуваат дека воздухопловите се оперативни и системот е подготвен за справување со нови огнени стихии.
„Во овој момент имаме три оперативни ер-трактори и четири пилоти и сме подготвени за сезоната на пожари. Она што сакам да замолам е граѓаните и пожарникарите да не шират непотребна паника. Сите пожари се страшни кога се гледаат одблизу, но наша задача е да ги гаснеме, а не да шириме паника“, изјави Стојанче Ангелов, директор на Дирекцијата за заштита и спасување.
Според првичните информации, пожарите во штипско не се поврзани, иако почнале да се шират од исто место, кај викенд-населбата Плуждино. Едниот најверојатно е предизвикан од гром, а за другиот постојат сомнежи дека е предизвикан од човечки фактор.
