Премиерот на Унгарија Виктор Орбан од Рим изјави дека мировниот процес е активен и напредува, и покрај обидите на Брисел да ја маргинализира Унгарија и да ја исклучи од клучните европски одлуки.
Во опширно интервју за „abouthungary“, Орбан ја нагласи централната улога на Унгарија во меѓународната дипломатија и ја потврди цврстата посветеност на земјата на мирот, суверенитетот и енергетската безбедност.
Орбан зборуваше за својата прва средба со папата Лав XIV, опишувајќи го Ватикан како духовен центар на растечката глобална антивоена мрежа.
– Во светот постои мрежа што се спротивставува на војната, со две фокусни точки: една на моќта предводена од претседателот на САД и една на духот, која се наоѓа овде кај Светиот Отец. Ние црпиме сила, мотивација и благослов од двете, изјави премиерот на Унгарија.
Тој потенцираше дека оваа алијанса сега го вклучува и претседателот Доналд Трамп, кој се вратил во мировниот камп со опипливи резултати, вклучувајќи го неодамнешниот прекин на огнот во Газа.
Орбан потврди дека планираниот мировен самит меѓу рускиот и американскиот претседател сѐ уште треба да се одржи во Будимпешта. – Тој самит ќе се случи. Прифатете го тоа како факт“ рече тој.
Иако точниот датум останува неизвесен, Орбан истакна дека рамката е веќе поставена. – Погледнете го последниот голем мировен самит во Шарм Ел Шеик. Беше финализиран во рок од три дена по месеци заднински разговори. Истото може да се случи и овде, потенцираше тој.
Орбан, како што наведува порталот, го отфрли најновиот обид на Брисел да ја заобиколи Унгарија во одлучувањето за Украина, јасно наведувајќи дека таков преседан би бил закана за сите земји-членки. – Ниту една земја не сака да го отвори тој преседан. Денес е Унгарија, утре може да биде која било од нив. Орбан додаде дека Унгарија, Словачка, а сега и Чешка, имаат мировно ориентирани влади, а ескалацијата на трошоците за војната ги тера дури и западните лидери повторно да размислат.
– На Европа ѝ снемува пари. Колку подолго трае оваа војна, толку станува појасно: едноставно не можеме да си ја дозволиме, нагласи тој.
Во однос на иднината, Орбан изложи четири клучни цели: мировен договор меѓу САД и Русија, стратешко партнерство со Украина, наместо партнерство за членство, пристап до европските фондови за национален развој и слобода на земјите-членки на ЕУ да водат сопствена енергетска политика.
„Ако некој не сака да купува руска енергија, во ред. Но, нека не им забранува на другите кои мораат“, заклучи Орбан.
