Општина Градско објави јавен повик за пријавување на штети на земјоделски насади предизвикани од атмосферска непогода – мраз што ја зафати општина на 2, 3 и 4 мај годинава. Пријавувањето, како што се вели во објавата, ќе се врши од денеска до 15 мај секој работен ден од 8 до 14 часот во просториите на Општина Градско.
-Ги повикуваме сите земјоделци кои имаат претрпено штети навремено да поднесат пријава, потенцираат од Општина Градско.
По завршувањето на пријавувањето, односно по 15 мај Комисијата за штети на Општина Градско ќе излезе на терен и ќе ја утврди штетата кај земјоделските насади. Нивниот извештај потоа треба да го прифати Советот на Општина Градско на седница, а потоа треба да се достави на прифаќање и од централната Комисија за штети во Скопје.
Инаку според првичните информации добиени од земјоделците во Општина Градско, најголем дел од штетите од мразот се кај лозовите насади и овошките лоцирани покрај реката Вардар.
