Во Лесковачкиот културен центар се одржа Свечена академија по повод 21 година од основањето на Националниот совет на македонската национална заедница во Република Србија и 10 години од воведувањето на изборниот предмет Македонски јазик со елементи на национална култура во основните училишта во Лесковац и околината, информираат денеска од Националниот совет.
На свеченоста, која се одржала синоќа, присуствувале бројни претставници на институции од Република Србија и Македонија, меѓу кои заменичката министерка за европски прашања Викторија Трајков, заменик министерот за администрација Лазе Јакимоски, директорот на Агенцијата за иселеништво Горан Ангелов, амбасадорот на Македонија во Србија Никола Тупанчески, советникот на министерот за човекови и малцински права и општествен дијалог на Република Србија, началникит на Јаблсничкиот округ Милош Ќириќ, директорката на Институтот за македонски јазик д-р Елена Јованова Грујовска со бројна делегација од институтот, претставници на македонските здруженија во Србија.
Свечената академија била збогатена со културно-уметничка програма подготвена од наставниците кои ја изведуваат наставата по македонски јазик со елементи на национална култура, а во програмата учествувале повеќе од 50 ученици кои го учат овој изборен предмет во четири основни училишта во Лесковац и околината.
