Што се случувало во Агенцијата за разузнавање минативе години? Одговор на ова прашање засега нема од Обвинителството за гонење организриан криминал и корупција. Од таму за телевизија Алфа единствено велат дека постапката била во предистрага и повеќе детали овој момент не можело да се откриваат.
-Во рамките на предистражна постапка што се води во ОЈО ГОКК, се врши увид во документација на АР и анализа на прибраните материјали, по што ќе биде донесена јавнообвинителска одлука. Во овој момент обвинителството не е во можност да споделува повеќе детали за текот на предистрагата, велат од ОЈО ГОКК.
Она што засега го знае пошироката јавност е дека обвинители и инстражители влегле во македонското разузнавање пред неколку месеци.
Покрај во разузнавање, се уште не е познато да каде е постапката на обвинителите и во Агенцијата за национална безбедност.
Инаку, во текот на оваа недела шест пратеници, членови на Комисијата за надзор на работата на АНБ и АР, кои поседуваат безбедносен сертификат, беа во посета и увид на двете агенции. Ова доаѓа откако беше објавен скандалот дека во периодот од 2019-та до 2024-та година имало нелегално следење и прислушување.
Според информациите во прв ред најследен бил актуелниот премиер, тогаш лидер на опозицијата Христијан Мицкоски, вицепремиерот и министер за транспорт Александар Николоски, поранешниот министер за внатрешни работи Оливер Спасовски, контроверзната поранешна шефица на Обвинителството за гонење организиран криминал и корупција Вилма Русковска, бизнисменот Орце Камчев, новинари и други јавни личности.
Поради овие сомнежи Обвинителството за гонење организиран криминал и корупција на почетокот на минатиот месец отвори предмет, кој е во предистражна постапка, но повеќе детали не можеа да соопштат поради тајноста на документите.
Матеја Петровски
