Со инвестиција од 8,5 милиони евра, компанијата „Макпрогрес“ ја пушти во употреба новата фабрика за производство на вафли од брендот „Винчини“. Средствата се обезбедени преку сопствени извори, банкарски кредити и унгарската кредитна линија на Владата. Новиот производствен погон е изграден неполна година по пожарот што зафати дел од фабричкиот комплекс. Фабриката е изградена за шест месеци и располага со две современи производни линии.
„Инсталиравме две производни линии и веќе се во функција. До 40 вработувања сега, а планираме дополнително 40 следната година, бидејќи овде е предвидено да се дуплира капацитетот на производство. Она што е карактеристично е дека инвестицијата е најнова технологија за нов тип на производи“, изјави генералниот директор на Винчини, Глигор Цветанов.
Премиерот порача дека Владата ќе продолжи со поддршка на домашните компании, оценувајќи дека оваа фабрика претставува успешна приказна како еден мал семеен бизнис се трансформирал во производител со годишен промет од над 40 милиони евра.
„Компанијата навистина претставува еден од фундаментите, темелите на македонската кондиторска индустрија. Ние како Влада ќе сториме сè што можеме за да помагаме ваков тип бизниси, бидејќи околу 80% од вкупното производство е практично наменето за извоз“, изјави премиерот Христијан Мицкоски.
Во фабриката „Винчини“ работат 670 работници. Пожарот што избувна во септември минатата година зафати дел од производствените капацитети, по што компанијата започна со брза обнова и реконструкција на погоните.
