Задржување на ценовната стабилност, односно ниска инфлација и одржување на курсот на денарот, финансиска стабилност и поддршка на политиките на Владата – ова се приоритетите на новиот, шестти по ред гувернер на Народната Банка, Трајко Славески. Откако тој беше избран во Собранието вчера вечер со 68 гласа „за“ и 16 „против“, вели дека ќе ја оправда довербата, а на оние што го критикуваа им порача дека Народната банка ќе остане независна институциуа, без политичко влијание. Потенцираше дека бил присутен во законодавниот дом при формирањето на Народната банка и воведувањето на денарот како национална валута и дека ја следи работата и надлежностите на монетарните власти низ годините.
Еден од најголемите предизвици ќе биде одржувањето на ниска стапка на инфлација. Новиот гувернер уверува дека курсот на денарот ќе остане стабилен и врзан за еврото – уверува Славески.
Новиот гувернер Трајко Славески ќе ја извршува функцијата во следните 7 години. Тој на позицијата прв човек на монетарната власт доаѓа од местото Претседател на Советот на Град Скопје. Своето образование го комплетирал на Економскиот Факултет во Скопје, кадешто денеска предава како редовен професор. Посетувал постдипломски студии на Калифорнискиот државен Универзитет во Чико, САД и на Универзитетот Харвард. Бил визитинг професор на два универзитети, автор е на бројни книги и статии, објавени во научни и стручни списанија во земјата и странство, од областа на приватизацијата, економското преструктуирање, економскиот развој, економските и социјалните функции на државата. Бил министер за развој во периодот од 1999 до 2000 година и министер за финансии од 2006-та до 2009-та година.
