Субвенциите на лозарите во целост се исплатени. На овој начин Владата го стимулира лозарството и го вреднува трудот на лозарите, порача вицепремиерот Александар Николоски. Во Неготино тој присуствуваше на традиционалното закројување на лозово гранче по повод Св. Трифун, чувар и заштитник на лозарите. Николоски на лозарите им посака плодна година и повисоки откупни цени, посочувајќи дека при неговата последна посета на Париз, македонското вино по својот квалитет успеало да се етаблира меѓу најврвните европски вина.
„Целосно се исплатени субвенциите за сите оние кои макотрпно работат, произведуваат. Се надевам дека тоа ќе биде мотив и стимул и оваа сезона да има добар род и што повеќе да се мотивирани земјоделците за што повеќе да сработат. Ние ќе продолжиме да ги поддржуваме и да го стимулираме земјоделството. Цените кои што можат да се видат оваа година се навистина добри и се надеваме дека следната сезона ќе имаме уште подобри цени“, изјави Александар Николоски, вицепремиер и министер за транспорт и врски.
Градоначалничката на Неготино, Марија Нацева, истакна дека локалната самоуправа останува цврсто на страната на лозарите и е подготвена да го слушне нивниот глас и потреби.
„Сакам да им честитам на сите земјоделци и лозари кои меѓувреме ги добија своите субвенции со кои им се валоризира нивниот труд кој го вложуваат преку целата година. Ние како локална самоуправа остануваме да стоиме цврсто и да го слушнеме нивниот глас“, изјави Марија Нацева, градоначалничка на Неготино.
Со цел дополнително да се валоризира лозарството, во Неготино беа поставени и штандови на кои локалните производители ги промовираа своите производи. Освен ракија и вино, од грозјето се произведува и еликсир на животот, објаснува младата лозарка Ангела Јовановиќ, посочувајќи дека лозарството нуди многу повеќе од традиционалните производи.
„Од грозјето се произведува маџун. Тоа е посебна техника за производство на сируп од грозје, кој служи за зајакнување на имунитетот, подобрување на крвната слика. Го викаат уште и еликсир на животот“, изјави производителката Ангела Јовановиќ.
При денешната посета на Неготино, вицепремиерот Николоски истакна дека Владата ќе продолжи со поддршка и во делот на инфраструктурата, посочувајќи ја како клучна за полесна комуникација и економски развој во регионот.
