Нема нови интервенции на пациенти на Клиниката за токсикологија. Сите 13 луѓе кои биле во близина на пожарот во Трубарево и побарале помош во текот на вчерашниот ден се во добра здравствена состојба — информираат за Алфа од Токсикологија.
Во меѓувреме, Институтот за јавно здравје ги објави и анализите од мострите кои ги земале од околината на Трубарево. Истите покажале дека нема зголемена радијација во почвата и воздухот во Трубарево. Дали има јонизирачко зрачење во водата ќе биде познато до крајот на денот.
Она што е познато досега е дека: Два до три пати биле повисоки вредности на сулфур и азот, дури до 300 пати повеќе јаглерод моноксид во воздухот..покажале прелиминарните резултати на Инспекторатот за животна средина по пожарот во Трубарево.
До петок ќе бидат готови и резултатите со кои ќе биде јасно какви тешки метали се дигнаа над Скопје – што се горело во текот на денот во складиштето ќе покажат дневните извештаи на компанијата Ф-Групација, кои се во рацете на Јавното обвинителство.
