Обвинителството се уште молчи по вчерашната акција во валандовската компанија „Грин Лајф”, од каде беше запленет еден тон канабис. „Грин лајф„ е една од шесте на кои Владата им ги одзеде лиценците за работа по спроведените контроли. Според официјалните информации сопственички удел во компанијата основана 1.1.2018, има српската компанија „Био натуралс”, која во Србија, се поврзува со истраги за шверц на канабис во Македонија.
Од МВР, информираа дека вчера по наредба на јавен обвинител од Основното јавно обвинителство Гевгелија, полициски службеници од СВР Струмица и ОВР Валандово, извршиле претрес во просториите на правниот субјект во Јосифово, при што била пронајдена и одземена марихуаната.
Оваа заплена е дел од пошироката акција во која досега се одземени околу 40тони марихуана од компании што поседувале лиценци за одгледување канабис за медицински цели.
Покрај „Грин Лајф”, лиценците им беа одземени и на „ЦБД медплант”, „Лајф плант”, „Атафарм”, „Канабидоис” и „Алфа фарм” чиј косопственик српски државјанин беше уапсен во Србија, поради шверц на 5тони марихуана.
Откако тамошните органи ги објавија сомнежите дека марихуаната потекнува од Македонија, македонската полиција и обвинителство започнаа акција. Основното јавно обвинетелство за гонење на организиран криминал и корупција, отвори истрага за шестмина кои се сомничат за вмешаност во шверцот во Србија, а надлежните органи започнаа постапка за преиспитување на лиценците.
Како што вчера соопшти министерот за здравство, Азир Алиу, одлуката за одземање на лиценците е донесена поради утврдени неправилности, меѓу кои несоодветно складирање на сувиот цвет, недоследно известување до надлежната Комисија и недостасуваање целосна документација за продажба и трансфер.