Уште еден пеколен ден со високи температури е пред нас. Од УХМР прогнозираат над 40 степени на повеќе места низ државата. Вака, според синоптичарите, ќе биде до недела, кога се очекува опаѓање на дневната температура и врнежи од дожд и грмежи.
Поради топлотниот бран, од вчера има препораки за заштита на граѓаните. На работодавачите им се препорачува од денеска до сабота да ги ослободат од работа бремените жени и луѓето постари од 60 години, а се овозможува и работа од далечина и флексибилно и двократно работно време онаму каде што е изводливо.
Исто така, се препорачува да се одложи работниот процес во периодот од 11 до 17 часот за оние работници кои се изложени на директна топлина.
Овие препораки не важат за вработените во критичната инфраструктура, како што се здравството, полицијата, армијата, транспортот, енергетиката и јавните комунални претпријатија.
