Инфлацијата постепено се намалува. Очекувањата на Владата се таа да продолжи да паѓа во последните два месеци од годинава. За следната година, предвидено е таа да се сведе на нивото помеѓу два и три проценти, вели премиерот Христијан Мицкоски. Таква е и проекцијата во државниот буџет, инфлација за 2026-та од 2 и пол отсто. Инаку, според последните податоци на државната статистика, порастот на трошоците за живот изнесуваше 4,5% во октомври, што е пад од 0,2 пп споредено со месецот претходно.
Комисијата за заштита на конкуренцијата е екипирана и активна за да ги лови евентуалните нерегуларности и непочитување на Законот за нефер трговски практики и картелски здружувања на трговците во обид да ги диктираат количините и цените. Досега се изречени глоби во износ од над 3,5 милиони денари, одлуки за кои се чека потврда од Управен суд. Премиерот Мицкоски вели дека треба да се почека и на одлуката во врска со картелското здружување на 4 големи ланци маркети.
„Да оставиме Антимонополската комисија да си ја заврши својата работа. Мислам дека наскоро ќе има и разврска“ – рече Христијан Мицкоски – претседател на Влада.
Владата сака да ги дисциплинира големите трговци. Заменик министерот за економија Марјан Ристески пред една недела рече дека тоа може да се случи само со неколкукратно повисоки казни, кои треба да стартуваат во 2026-та година. Сегашната највисока глоба од 20 илјади евра е лесно прифатлива за големите маркети со огромен промет и профити. Инаку, цените на храната внимателно се следат и засега не се планираат мерки за да се спречи нивно евентуално зголемување. Токму затоа, Пазарниот инспекторат е активно на терен и досега направил рекордни 20 илјади контроли.
