Инфраструктурното поврзување – клучно за поголема економска соработка. Ова го порачаа околу 300 стопанственици од Македонија и Србија кои учествуваат на бизнис форум во Скопје и имаат директни средби за да договорат идни инвестициски проекти. Вложувањата во брзата пруга по Коридорот 10, гасното поврзување преку интерконектор и модернизација на автопатите се најважните проекти кои ќе ги раздвижат економиите. Тие треба да ги надминат главните ризици кои се недостаток на енергенси и пораст на цените во регионот како резултат на геополитичките поместувања и тензии.
„Затоа е важно, брзо да работиме на тие стратешки проекти. Гасниот интерконектор е исклучително важен. Кога зборуваме за енергетика и диверзификација за цел регион. Тоа е од пресудно значење, како и поврзувањето, односно железничката инфраструктура. Само преку тие два стратешки проекти, ние можеме да обезбедиме економска безбедност на многу поголемо ниво од досегашното“ – вели Марко Чадеж –претседател на Стопанска комора на Србија.
Бизнисмените децидни, ниту една македонски и ли српска компанија не може сама да го освои глобалниот пазар – регионалното поврзување го потенцираа како клучно за раст и развој на компаниите од двете земји. Тие јасно порачуваат – Македонија и Србија да се борат со корупцијата која ги кочи двете стопанства.
Според Вицепремиерот Стоилковиќ, Македонија бележи уверливи економски резултати – економски раст од 3,4%, инфлацијата е меѓу 3,5 и 4%, растот на нето платата, на индустриското производство. Износот од 1,2 милијарди евра странски инвестиции е потврда, според него дека државава е атрактивна за инвестиции. Можностите за соработка се огромни , а очекувањата се трговската размена межу двете земји да достигне две милијарди евра.
За српската вицепремиерка Месаровиќ, македонското и српското стопанство се компатибилни. Речиси 1000 македонски компании работат во Србија, а извозот кон Македонија пораснал за 16%.
„Македонија и Србија имаат иста амбиција, нашиот регион да биде стабилен, предвидлив, посилен и пожелен за живот и за инвестиции. Нашата задача е да градиме мостови меѓу двете стопанства, нашите компании, нашите пазари и пред се нашите луѓе“ – вели Адријана Месаровиќ – Вицепремиер и министер за економија на Србија.
За дополнително да ја продлабочат соработката, Македонија и Србија потпишаа 5-годишен меморандум кој стапува во сила веднаш. Со него, ќе се унапреди комуникацијата меѓу институциите и приватниот сектор, ќе се координираат економските политики, а посебен акцент ќе биде ставен на инфраструктурното поврзување и соработката на проекти од заеднички интерес.
