Поскапи производи и помала конкурентност на европските пазари. Обврската за декарбонизација ќе значи дополнителен трошок за компаниите, првично за оние од челичниот и цементниот сектор. Од први јануари, фирмите од државите што не се членки на Европската Унија ќе треба да плаќаат такса за загадување за извезените производи согласно нивото на т.н. јаглероден отпечаток. Министерката за енергетика Сања Божиновска вели дека се уште не се знае како ќе се применува ова правило и колку ќе изнесува оваа такса. Надлежните кај нас интензивно преговараат. Во игра се и одредени изземања, но се ќе биде појасно до крајот на годинава.
Стопанствениците велат дека дека овие барања од ЕУ ќе значат поголеми трошоци за нив. Од друга страна, обврските ќе мора да се исполнат, ако сакаат да извезуваат во ЕУ.
За компаниите што побрзо да ги намалат емисиите на јаглерод диоксид, Министерството за енергетика, Стопанската комора и Европската инвестициска банка промовираа Водич за декарбонизација. Од ЕИБ велат дека расте свесноста за користење зелена енергија. 27% од македонските компании сметаат дека зелените инвестиции можат да ги направат поконкурентни, а 30% дека можат да имаат раст во приходите.
Според Извештајот на Светска банка за климатски промени и развој од минатата година, Македонија може да стане земја со нулта емиси,и ако инвестира 5,6 милијарди долари до 2050-та година во декарбонизација на енергетиката, транспортната индустрија и градежниот сектор.
